溫布萊出戰今屆歐聯贏晒
今晚歐聯16強次回合重頭戲，熱刺喺主場溫布萊球場再鬥祖雲達斯。熱刺首回合攞到兩個作客入球，可以話佔盡先機，加上佢哋今屆喺溫布萊踢嘅3仗歐聯全勝，強如皇馬都要俯首稱臣，面對過往「訪英」戰績曳嘅祖記，熱刺有望贏波晉級，少讓平半1.83倍上盤堅筍。
（有線61、64、201及203台周四凌晨3時45分直播）
熱刺上屆歐聯表現麻麻，連分組賽都未能突圍，大部分球迷季初都唔敢對佢哋今屆抱期望，尤其當時熱刺仲畀「溫布萊魔咒」困擾，點知今屆一反常態，熱刺分組賽3仗主場全部贏晒，連皇馬到訪都要輸1比3，除當家射手哈利卡尼日漸成長成為英格蘭、乃至歐洲頂級射手外，「太極虎」孫興民近期亦出盡風頭，近兩次主場上陣個人省夠4粒，配合「發電機」基斯甸艾歷臣，絕對有力攻破「祖記」大門，況且熱刺仲有後防主將維頓漢及時復出，無後顧下一眾前線好手可盡情發揮。
「老婦人」訪英成績曳
論歐戰經驗「祖記」肯定勝一籌，唯獨球隊過往作客英超兵成績差劣，近10仗僅得1勝2和7負，可以話英格蘭絕非「老婦人」福地，加上佢哋近期啞火，近6仗場場入得1球起2球止，上仗意甲面對拉素全場僅1次射門中龍，主力射手希古恩雖告傷愈，但就算趕及上陣狀態難有保證，「祖記」今仗想出線要爭取入波焗攻，隨時畀熱刺反擊有機可乘，主隊讓平半值得支持。