天使展翅倒戈衝艦
歐聯16強次回合今晚爆發重量級大戰，法甲豪門巴黎聖日耳門(PSG)主場火併衞冕嘅皇家馬德里。PSG首回合輸1比3，之後仲有王牌尼馬重創長抖，不過PSG中前場星光熠熠，倒戈嘅「天使」迪馬利亞狀態勁弗，絕地反擊必谷前搶攻，遇上擅打反擊的「銀河艦隊」好可能演入球騷，3.5球中位數大盤值博。
（有線61及201台周三凌晨3時45分直播）
PSG喺首回合作客皇馬，領先1球之下忽然玩保守，最終被C朗梅開二度以1比3落敗，主帥艾美利吸取教訓，肯定會以攻為守向皇馬施壓，何況佢哋有1個作客入球在手，今仗只要贏2比0都可憑作客入球晉級，主場出擊再無退路，勢必開盡火力搶攻。
儘管PSG王牌尼馬需要養傷3個月，今季提早收咧，但哀兵作戰反而激起戰意，佢嘅「替身」迪馬利亞狀態大勇，今年「天使」喺各項賽事上陣14仗入13球，絕不比尼馬遜色，另一射手基利安麥巴比亦傷愈候命，加上PSG今屆歐聯7仗狂轟26球，有6次總入球數開4球或以上，火力極強。
皇馬「BBC」火力驚人
不過PSG盡地一煲，令原本唔多穩嘅防線暴露更多空位，正中擅打反擊嘅皇馬下懷，特別係「BBC」鋒線賓施馬、加里夫巴利同C朗火力驚人，乃近4屆歐聯3度封王嘅重臣，C朗個人喺「銀河艦隊」嘅歐聯入球累積達101球，破紀錄成為歐聯史上首位為同一支球隊攻入百球球員，今仗必趁PSG空群而出打反擊，預料入波唔會少，捧大盤最明智。