德甲「蜜蜂兵團」多蒙特今季猶如坐過山車，大起大落，今晚喺歐霸16強首回合主場迎戰奧地利勁旅薩爾斯堡，絕對唔易踢，而且薩軍火力唔嘢小，隨時合演入球騷，捧中位數2.5球大盤更划算。
（now 634及668周五凌晨2時直播）
馬高列奧斯隨時候命
多蒙特經過季初主帥保斯嘅折騰，由連場報捷殺上聯賽榜首，及後多場不勝至歐聯出局，無奈下最終要請佢食無情雞。不過中途接手嘅史杜加只能穩住跌勢，雖然踏入2018年「蜜蜂兵團」在各項賽事未輸過，但只得4勝6和成績一般。唯一令人安慰係「玻璃男神」馬高列奧斯傷愈復出逐漸上力，呢位球星近4仗入3粒，但由於佢實在太易受傷，今仗未必擔正，前線繼續靠季中來投已入5球嘅「亞伊」巴舒亞伊數胡。
另一邊廂，奧地利山寨王薩爾斯堡一向希望喺歐洲賽有一番作為，其中首席射手達布，喺各項賽事已有22球進帳。薩軍近6仗取得5勝1和，狂轟20球，包括上圈歐霸兩回合計以4比3淘汰皇家蘇斯達，實力不容小覷，造訪後防唔太穩陣嘅多蒙特，鬥攻格局實多波入，各位球迷等睇入球騷。