加度素領軍小將生猛晒
歐霸盃16強首回合今晚爆發，最有話題肯定係意甲雄師AC米蘭主場迎戰阿仙奴。AC米蘭自新帥加度素上任後，成績穩步上揚，尤其一眾自家青訓球員表現搶眼，令球隊重現活力，相反「兵工廠」近期狂輸波，士氣已經跌到最低點，而且球隊近4次歐戰作客意甲球隊慘錄3負，今仗主勝係不二之選。
（Now 633周五凌晨2時直播）
柏德列古度尼打響名堂
AC米蘭新帥加度素近期帶領呢支意甲老牌勁旅打出佳績，擺脫季初頹勢之餘，隊中唔少年輕球員亦得到上陣機會，包括年僅20歲嘅前鋒柏德列古度尼，呢位出自米蘭青訓系統嘅年輕鋒將，今季多次攻入關鍵入球，包括喺歐霸盃32強首回合，面對盧多格德斯嗰陣為球隊先開紀錄，前途無可限量，今仗相信會成為「紅黑兵團」爭勝奇兵。
「兵工廠」阿仙奴近期走勢疲弱，尤其繼英聯盃決賽吞曼城3蛋後，返到聯賽再一次輸畀曼城及不敵白禮頓，連埋上一圈次回合主場敗於奧斯達辛斯腳下，阿仙奴已經連輸4場，據聞領隊雲格唔單止失去董事局嘅信任，連球員都開始對教授失去信心，依家成隊波可以話係立立亂。
阿仙奴靠韋碧克孭飛
唔好忘記，阿仙奴1月簽入嘅星級箭頭奧巴美揚，喺歐霸盃係唔合上陣資格，另一射手拿卡錫迪又養緊傷，今仗要焗用狀態低沉嘅韋碧克擔任正箭頭，入波難度更大。阿仙奴過往歐戰作客意甲球隊多數失望而回，包括曾經0比4遭AC米蘭血洗，今次作客聖西路球場，預料阿仙奴難有作為，一於捧AC米蘭2.02倍主勝。