誓保前6闖季後賽
千祈咪以為今日澳職西悉尼流浪者主場出擊、迎戰榜尾嘅威靈頓鳳凰冇睇頭呀，當你睇番依家積分榜，見「西流」排喺第6位，你就明白呢場佢哋要主場贏波全取3分，以保住前6名位置晉級季後賽係幾咁重要，難得佢哋近況回穩腳風順，主場唔難報捷。
（有線64及203台周六下午4時50分直播）
「西流」近況已經慢慢重回正軌，近5場比賽只係輸過1場，輸畀榜首FC悉尼無話可說。周中突然有傳前「西流」教頭普波域有機會回巢，但我相信以甘巴爾教頭同班球員嘅良好關係，加埋佢帶領「西流」以來所攞到嘅成績，若果隊波入到季後賽的話，球會都唔使搵普波域回流啦！
威靈頓鳳凰炒領隊洩氣
今日「西流」可以「夫添」，後防班頓咸美爾、中場保尼華斯亞、前鋒辛達利比都可以候命上陣，加上隊波腳風極順，近6仗場場有波入，今日要主場贏波應該冇難度。
至於作客嘅威靈頓鳳凰，踢咗21場只得17分，排聯賽榜包尾，睇怕都係無緣季後賽。球隊又啱啱炒咗領隊，隊內士氣一般，加上佢哋一向作客唔多掂，今季11場作客輸咗8場失21球，平均每場失2球咁滯。鳳凰後防守唔住之餘，今日仲有箭頭卡路查奴域肯定唔能夠上陣，隊波問題多多，作客呢3分可以話冇硬。大家全力撐主隊「西流」啦！睇完呢場，接住夜晚7點鐘仲有珀斯光輝對中岸水手繼續直播，記得捧場喇。
（有線64台周六晚7時直播）