今晚英超重量級大戰，唔使問阿貴，就梗係雙紅會──曼聯主場強撼利物浦。雖然曼城在榜首一放絕塵，令今場兩軍爭標嘅機會，只剩下渺茫同冇機會，但雙紅會地位等同國家打吡，彼此恩怨一疋布咁長，每次碰頭例必打甩髀，就算係中立球迷，都會睇到熱血沸騰，呢類打吡戰最講戰鬥精神，任何數據、實力分野及球隊排名等，統統可以擺埋一邊，贏家往往係由頭堅持到尾、未有放棄嘅一隊。
傳統大戰兩軍主帥必緊張
現時「2哥」曼聯領先利物浦2分，又有主場之利，竟然只係開平手盤，讓球主客和更獲得受讓咁筍，莊家當然係諗過度過先咁開喇，由於曼聯下周中有歐聯16強次回合對西維爾嘅後顧之憂，反而利物浦喺剛周中歐聯hea住踢悶和波圖，兩回合計仍贏5粒晉級8強，呢個係紅魔被略為睇低嘅原因。不過，正如筆者開頭所講，打吡戰實打甩髀，就算功利如曼聯主帥莫連奴，都不能輕視雙紅會嘅重要性，紅軍主帥高普亦如是，呢種傳統大戰往往難分高下，加上雙方近4次正面交鋒全部打和，不妨直取和波及1比1波膽。