直播戲碼賀芬咸迎戰禾夫斯堡，賀芬咸經過早前傷兵潮表現反覆後，人腳已經回復原整，上輪作客擊潰奧格斯堡，整體演出已盡復舊觀，前線有來自班霸拜仁借將，優質德國希望前鋒基拿比掛帥，配合高大前鋒施沙拉爾同近期腳風極順嘅卡拉馬歷攻堅，火力有保證。賀芬咸仲有機會爭取下屆歐洲賽入場券，少帥拿高斯文要求仲高，佢話除咗想踢歐洲賽，最重要係踢出悅目足球氹主場球迷，今晚勢必搶攻，有力擊退狀態低沉同一味主守嘅禾夫斯堡，賀芬咸讓半一唔算多，黑柴捧上盤。
賀芬咸進攻足球轟禾堡
禾夫斯堡近期換帥，揀咗有15年執教經驗但缺乏成績嘅拉巴迪亞帶隊，會方話明揀佢係因為佢帶隊護級經驗豐富，但佢上任後球隊兩戰未開齋只得1分，依家同緬恩斯同分排尾三、四，護級壓力甚大，不過拉巴迪亞一如過往，只係加強防守並未能為球隊喺戰術上帶嚟改進，上輪主場不敵利華，賽後佢話對手踢得較好，值得攞晒3分，今仗賽前亦只話希望球員能夠團結共度難關，好明顯能力有限，佢哋雖然都有利物浦借嚟嘅優質比利時前鋒奧歷治，但基於戰術佢喺前線只能孤軍作戰，唔容易畀到威脅主隊。