今晚英超尾場「倫敦打吡」，車路士主場鬥為護級而努力嘅水晶宮。「藍戰士」下周要作客巴塞隆拿應付歐聯16強次回合，難免顧此失彼，加上近5次對水晶宮只得2勝3負，主勝賠率太熱博唔過，留意當中有4仗總入球開3球或以上，捧中位數2.5球嘅1.59倍大盤仲划算。
（Now 621及LeSports周日凌晨1時30分直播）
車仔防線犯錯頻頻
車路士近況極曳，近5仗聯賽只贏過包尾大幡西布朗，其餘4仗先後輸畀般尼茅夫、屈福特同曼市雙雄，後防經常犯錯致失波頻頻，依家同第4位嘅熱刺有5分距離，爭入前4形勢被動，若然下周中嘅歐聯再有咩閃失，球隊隨時大地震，無論喺兵源調動、抑或球員心態，車路士都難予人信心。
況且車路士近年面對水晶宮冇任何優勢，近5次交手只得2勝3負，其中兩次喺史丹福橋球場交手都以1比2落敗。水晶宮依家排聯賽榜第18位，搶分護級心切，上仗面對「2哥」曼聯一度領先2比0，可惜最終功敗垂成倒輸，搏甩髀踢法入得又失得，有望再同車路士合演入球騷。