哥帥效忠 將士賣命
今輪英超壓軸戰上演「雙城會」，史篤城主場對曼城，雙方實力距離懸殊，榜首曼城拋離次席曼聯13分，兼踢少1場，捧盃只係時間問題，領隊哥迪奧拿日前更加發表「效忠宣言」，表明想留隊執教10年，打造「藍月亮王朝」，進一步振奮軍心，有力再大炒史篤城，曼城讓兩球，都要讓球客勝。
（Now 621及LeSports周二凌晨4時直播）
哥迪奧拿上季初到英超「學嘢」，今季進入收成期，率領曼城踢出超班水準，但由於佢份合約將於明年屆滿，加上巴黎聖日耳門等大球會都對佢虎視眈眈，哥帥去留成為曼城上下最關注問題。好彩佢識做，迅速打破跳槽傳聞，話願意長期留效，甚至想執教10年。
哥迪奧拿教波生涯，只曾教過巴塞4年及拜仁慕尼黑3年，依家話要教曼城10年，證明佢好喜歡現時工作環境。一般預料曼城即將開出1份年薪2,000萬鎊嘅新約，同哥帥續約至2021年。哥帥帶頭效忠，消除一大不明朗因，球員勢必追隨賣命。加上曼城近期走勢相當勇，包括英聯盃決賽及英超，合共贈阿仙奴6蛋，又擊敗車路士。上周中歐聯輸波，明顯有所留力，今仗出番真工夫，又係大炒格。
史篤城遇強例輸鑊甘
排尾二嘅史篤城雖然近5場英超僅1敗，但有4場和波，期間對手只係中下游球隊屈福特、般尼茅夫、白禮頓、李斯特城、修咸頓。史篤城遇上強隊，更加係輸鑊甘，近6次英超鬥「Big 6」都大敗3球或以上，包括同樣以0比3輸畀曼聯及利物浦，兩次對車路士，分別輸0比4及0比5，仲有1比5不敵熱刺，輸得最慘正係2比7慘敗畀曼城，今場都係凶多吉少。
分享到：