英超「4哥」熱刺今晚英超尾場作客鬥般尼茅夫，熱刺啱啱喺歐聯16強被意甲勁旅祖雲達斯淘汰，依家肯定集中火力保住聯賽前4，加上自從般尼茅夫2015/16球季升上英超以來，熱刺5次聯賽對般尼茅夫拎到4勝1和，哈利卡尼為爭金靴肯定搏命搶入波，撐熱刺上盤冇甩拖。（Now 621及LeSports周一凌晨零時直播）
熱刺近期雖要兼顧英超、英足盃同歐聯3條戰線，但聯賽表現似乎未受影響，特別自從上年12月以1比4作客不敵曼城之後，接住11場聯賽拎到8勝3和佳績，而且8場勝仗當中有7場保持0失球，無論攻守都有水準，何況熱刺喺歐聯出局，更加少一個賽事分心，為保前4定必乘勝追擊。
近5交手般尼茅夫4負
般尼茅夫依家排喺下游位置，雖然分數上仲未肯定「上岸」，但搶分壓力比起一眾榜末球隊相對較輕。般尼茅夫近3仗聯賽只得2和1負，3仗合共失7球，狀態唔算理想，而且球隊自升上英超以來，5次聯賽對熱刺僅獲1和4負，踢法似被剋死，就算主場出擊亦難樂觀，熱刺上盤值捧。
分享到：