衝歐聯無望兵工廠側側膊
近期聯賽3連敗嘅阿仙奴，爭入前4嘅目標已經愈趨渺茫，領隊雲格亦扯晒白旗，擺明會將精力放喺歐霸盃身上，今晚英超主場迎戰「大黃蜂」屈福特，隨時會被黃蜂尾後針拮死。客隊自從查維加西亞接手後成績爆升，對住冇晒鬥志嘅阿仙奴有力取得佳績，捧下盤最好路。
（Now 621及LeSports周日晚上9時30分直播）
阿仙奴上輪輸畀白禮頓後，距離第4位嘅熱刺13分，入前4幾乎肯定冇行，阿仙奴依家盡地一煲搶歐霸盃，周中作客意大利激鬥AC米蘭後，4日後又要應付次回合賽事，今晚呢場波可以話係「例行公事」，球員戰意至少打個5折。唔好忘記阿仙奴踏入2018年後，9場聯賽只贏過2場，Hea踢之下仲有乜爭勝信心呢？
作客嘅屈福特就啱啱相反，佢哋自從1月請到查維加西亞執教後，成隊波當堂生猛晒，呢位西班牙教頭上任後，屈福特喺5場聯賽拎到3勝1和1負成績，主場4比1大炒車路士更加係今季代表作，羅拔圖佩雷拉、李察利臣、杜哥利等實而不華球員個個都踢出水準，狀態可以話今季最弗時刻。
箭頭迪尼專恰阿仙奴
另外，步大力雄嘅屈福特箭頭迪尼可以話係「阿仙奴剋星」，佢喺今季首循環同上季次循環都成功攻破「兵工廠」大門，呢2場波「大黃蜂」都贏2比1，迪尼仲公開批評阿仙奴球員係冇膽匪類，擺到明有信心食住阿仙奴，今仗要搶分而回冇難度，今場仲有得受讓一球，下盤筍到爆。
分享到：