名帥對決高普食住寸王
今晚英超激爆「雙紅會」，「紅魔」曼聯主場對「紅軍」利物浦。翻查足智彩開盤以來，利物浦客W得2.45倍，係「紅軍」史上最熱一次，讓球主客和由排名較低嘅利物浦讓波亦好罕見！不過論氣勢「利記」確喺曼聯之上，加上莫連奴遇親高普都冇符，平手盤樂比睇好1.89倍嘅利物浦！
（Now 621及LeSports周六晚8時30分直播）
可能大家以為哥迪奧拿係莫連奴嘅剋星，但其實論對賽往績，高普先係「寸王」頭號勁敵，睇番莫連奴同高普交手8次，莫連奴只贏得1次，輸咗3次，比起對哥迪奧拿嘅兩成勝率仲低，莫連奴唯一贏嗰次仲要係2013年歐聯4強次回合，當時多蒙特首回合贏皇馬4比1，已有3球優勢在手，先畀莫連奴次回合攞番個尾彩，可見兩位名帥交鋒，莫連奴完全處於下風。
莫連奴戰術過時
樂比必須承認曾經都係莫連奴嘅擁護者，只不過時移勢易，佢套戰術唔能夠與時並進，對強隊永遠「泊大巴」但求穩穩陣陣，依家搞到連對實力一般嘅球隊都唔識攻，浪費一班進攻人才。當然，你有成績嘅話就話知你用咩戰術，但曼聯現時落後榜首曼城16分，「2哥」位亦畀利物浦同熱刺虎視眈眈，莫帥使咗咁多錢真係要檢討吓。
陣容冇咁「豪華」嘅利物浦今季踢出更悅目足球，聯賽入球數字多曼聯11球，入咗24球嘅穆罕默德沙拿大熟大勇，等閒之輩守佢唔住，唯一可以挑剔嘅係「紅軍」防線唔算穩，門將經常出錯，不過近期正選卡利奧斯明顯大有改善，近5場有4次保清白身，一句講晒：有進步！
歐聯因素利「紅軍」
利物浦另一着數係「歐聯因素」，周中對波圖收起沙拿下，輕鬆保持首回合嘅優勢入8強，反觀曼聯下周中歐聯次回合要硬撼西維爾，以莫連奴保守性格，今場睇怕又係大巴泊住先，既然兩隊近6次交手都開細盤，今場除利物浦平手盤外，不妨同時向1.92倍嘅2.5球細盤埋手，有權食晒兩瓣。