今晚另一場歐霸16強次回合焦點戰，由俄超「5哥」辛尼特主場對德甲勁旅RB萊比錫。辛尼特於首回合輸1比2，想出線今仗非勝不可，好彩佢哋主場堅惡，撞正近況麻麻嘅RB萊比錫，有力贏波收復前失，平手盤一於捧辛尼特。
（Now 635周五凌晨2時直播）
辛尼特喺首回合以1比2敗走，但攞到1個作客入球，今場只要贏1比0即可出線，有見及此，主帥文仙尼喺上仗聯賽收起射手高哥連、中場艾美蘭奴列干尼等主力，前者喺今屆歐霸有9粒進帳，可養精蓄銳備戰今仗。呢支俄超「5哥」主場堅惡，近5仗歐霸主場出擊，唔單止喺法定時間贏晒，而且全部喺上半場取得領先優勢，由頭贏到落尾堅搶韁，包括上圈對些路迪，首回合作客輸0比1之下，返自己地頭大勝3比0出線，主場威力不容小覷。
萊比錫態沉經驗不足
另邊廂，RB萊比錫近況麻麻，聯賽連盃賽，近6仗只得1勝2和3負，加上喺歐洲賽經驗不足，上圈歐霸作客贏拿玻里3比1，返主場竟輸0比2，僅僅憑作客入球較多出線堅驚險，今仗造訪2008年歐洲足協盃盟主（歐霸前身）嘅辛尼特，凶多吉少，平手盤必捧辛軍。
分享到：