幕幕經典！
今晚歐聯16強次回合焦點大戰，巴塞隆拿返主場迎戰車路士。每逢呢兩隊喺歐聯交鋒，締造多場經典戰役，2005年車仔閃擊戰+朗拿甸奴扭腰篤射、2006年林柏特零角度入波、2009年奧維保黑哨枉判+恩尼斯達天外飛仙靚波、2012年美斯極刑宴客等等，一幕幕從腦海中浮現出來，總會令人意想不到，今仗會否又有新驚喜呢？
干地為飯碗背城借一
首回合打和1比1，巴塞靠美斯歷來首度攻破車仔大門，搶得1個重要作客入球，今仗返魯營唔使一定要贏波，只需打和0比0亦可以晉級，略佔上風。撇除車仔球員不滿主帥干地、夏薩特欲離隊投皇馬等陰謀論，單純以波論波，車仔絕對唔輸蝕，一來聯賽戰績欠佳，干地為保帥位一定想喺歐聯發圍，二來有尼高路簡迪作為防線前屏障，配合夏薩特、韋利安打快速反擊，巴塞未必敢於大舉進攻。無論干地打算一開波即搶攻，還是睇準時機先拮佢一刀，佢哋都需要入波抵銷現時嘅劣勢，因此不能坐以待斃，好大機會上演入球騷，巴塞讓到一球/球半咁辣，筆者認為車仔受讓值博。
分享到：