周四凌晨歐聯16強次回合有宿敵對決，巴塞隆拿返到魯營球場再鬥車路士。原本想爭取衞冕英超嘅車仔，聯賽畀曼城拋開成條街，今季惟有歐聯取得佳績先至可以挽回面子，首回合車仔眾將搏盡死守，成功以1比1同巴塞握手言和，戰術明顯奏效，加上佢哋喺歐聯近8次面對巴塞取得2勝6和未輸過，細鬼認為車仔值得睇高一線，「藍戰士」受讓一球/球半，捧下盤。
（有線61、64、201及603台周四凌晨3時45分直播）
美斯蘇亞雷斯踢到殘
車路士領隊干地未能帶領球隊喺今季聯賽延續上季英超盟主嘅霸氣表現，早前更加多次傳出帥位不保嘅傳聞，好彩班球員戰意旺盛同鬥心十足，歐聯16強首回合以1比1打和巴塞隆拿之後，干地就大讚球隊表現「近乎完美」，除咗因為一次失誤畀巴塞偷到雞之外，整體表現的而且確相當抵讚。
干地喺中後場布下銅牆鐵壁，成功壓制巴塞，搞到對手無法用短傳滲透入危險地帶，睇得出干地係有啲計。加上前場有夏薩特同韋利安一班攻擊好手壓陣，搭埋同佢哋默契幾夾嘅前鋒基奧特，就算作客都絕對有力同巴塞過招。
巴塞雖然有美斯同蘇亞雷斯兩位實力強勁嘅前鋒坐鎮，不過近期由於過分依賴呢對用到殘晒嘅攻擊組合，走勢難免回落，尤其攻力明顯比季初減弱，美斯個人近4次為巴塞歐聯上陣，就只入得1球，呢場面對勢以血肉長城頑強抵抗嘅車仔防線，巴塞前場再冇作為嘅話，隨時陷入迷惘狀態，到時車仔反而仲有機可乘，都係捧車路士下盤好過。
分享到：