弗賴堡史特加鬥硬淨

弗賴堡史特加鬥硬淨
弗賴堡同史特加同位於德國南部巴登符騰堡州，兩軍大營相距只有130公里，坐火車往來唔使兩粒鐘，每次對壘雙方球迷都特別重視，係德甲其中一場重要嘅打吡戰，弗賴堡目前雖然只排第14位，但主場相當硬淨，呢支德甲最跑得嘅球隊，防線十分穩固，遇上近況上升中，同樣防守出色嘅史特加，絕對旗鼓相當，今場打吡戰雙方部署上都會以穩為先，賽前投注首選1.9倍半場和。

主隊上半場好難失波
弗賴堡上輪作客摸和哈化已見防線出色，但返到主場更硬淨，經過統計，佢哋今季平均每場奔跑74.4公里，係全德甲跑得最多嘅球隊，尤其上半場，喺有氣有力時真係好難攻破佢哋大門，弗賴堡今季德甲13度主場出擊，全場都只係輸過兩場，對手係聯賽榜一哥拜仁慕尼黑，同二哥史浩克04，除咗對呢兩支榜首球隊外，其餘11仗主場賽事，弗賴堡不但未輸過，上半場仲未失過波添，不過佢哋亦唔急於進攻，當中有9場半場開出0比0波膽，足見教練史特拉希作風貫徹以穩為先。

史特加今季長時間係作客蟲，但自從新帥泰阿芬哥古特上任後，大膽起用幾位新人試出彩虹，近6輪竟然取得4勝2和佳績，不過除咗作客對住有前冇後嘅科隆外，其餘大部分比賽都係以守為本，佢哋近14場德甲有12場總入球係兩球或以下，近5場聯賽有4場零失球，既然主守搵到着數，今晚打吡戰當然唔使變招啦！

分享到：