今日係3月16號，距離4月15號、今屆「澳職」最後一個常規賽賽日，啱啱好倒數一個月。喺仲有5輪比賽嘅最後直路階段，由於積分榜排名第5同第8位嘅球隊只有5分差距，呢幾隊波都係要出盡力去保住或者爭取季後賽一席位喇！排第6嘅阿德萊德聯今日會同3哥墨爾本城交手。「阿聯」當然想憑主場之利全取3分，鞏固季後賽入場券。墨爾本城近期狀態一般，完全唔似想取代「二哥」紐卡素噴射機咁，所以今場睇好主場出擊嘅「紅軍」。
（有線64及603台周五下午4時50分直播）
阿德萊德聯近5場主場只係輸過1場，其中迎戰榜首嘅FC悉尼都保持不敗，證明主場出擊有啲斤両。由於後面嘅珀斯光輝同埋布里斯班獅吼都追得好貼吓，「阿聯」邊敢放鬆呀！今場陣容上有中鋒卡禾斯域停賽復出，加上本身中前場嘅阿比沙路臣、艾隆同賴恩基圖等火力強大，要攻入後防不穩嘅「墨城」，應該易過借火！
墨爾本城防線散晒
作客嘅墨爾本城近期狀態麻麻，近3場全部輸晒不特止，最弊嘅係後防狂失8球。隨住近幾場波嚴重走樣，要追「噴射機」有一定難度；再者，同呢場對手、排第6嘅阿德萊德聯亦只係得番4分差距，再有乜差池，冇得踢季後賽就弊喇！睇佢哋近期表現，真係唔知想點，加上今季10場作客只係能夠贏到5場，同隊波實力都唔成正比！今日仲有防守主力奧沙麥馬歷缺陣，後防更加危危乎。此消彼長之下，呢勻信邊隊，你哋應該心水清啦！
分享到：