英超係全球最受歡迎嘅足球聯賽，呢點相信毋庸置疑，尤其係電視台為爭奪轉播權不惜一擲千金，因為唔愁冇球迷畀錢睇直播；由於轉播費及各方面收入水漲船高，英超各隊亦肯使錢引入更多球星，令聯賽更具吸引力；此外單以本港為例，冬令期間逢周六晚11時開波，頭場更開8點半，淨係呢啲黃金時段已經贏晒其他歐洲聯賽。
雖然英超嘅價值同吸引力愈嚟愈高，但競爭力就唔成正比，特別近年喺歐聯成績一般，上次能登上歐洲之巔要數到6年前嘅車路士。今屆歐聯有5隊英超兵入16強，以為復興在望，可惜只屬「虛假繁榮」，熱刺、曼聯及車仔先後被淘汰，前兩者更在首回合作客和波下，次回合返主場輸波先至出局，令人失望，8強得番曼城及利物浦，難同近年雄霸歐洲嘅西甲相提並論。
柏杜投降 般茅可打落水狗
言歸正傳，由於同時舉行足總盃，因此今晚只有4場英超上演，筆者心水推介係般尼茅夫主場對西布朗，包尾大幡西布朗聯賽6連敗，落後尾4嘅修咸頓8分，形勢嚴峻，但主帥柏杜早前放棄話執定半個包袱，連領隊都打定輸數，試問球員又有幾多信心呢？般茅可趁機打落水狗。
英超係昂貴足球
但非至強橫足球
分享到：