盃賽係寸王「保命丹」
剛喺歐聯出局嘅3支英超哀兵曼聯、熱刺及車路士，今明兩晚喺英格蘭足總盃8強重新出發，齊齊力爭「安慰獎」！今晚曼聯主場對白禮頓，莫連奴執教生涯共拎過8次本土盃賽，深明盃仔係「保命丹」，曼聯讓一球、球半樂比捧1.73倍上盤！
（ViuTV 99及Now 633周日凌晨3時45分直播）
莫連奴上季初嚟埗到執教曼聯，就勇奪聯賽盃及歐霸，雖然話含金量唔算高，但假假地都係錦標，起碼贏咗可氹住老闆及球迷先。隨住今季連番失利，足總盃成為曼聯最後希望，以莫連奴嘅勢利性格，自然將焦點放晒落足總盃身上。
莫連奴嘅本土盃賽戰績都算輝煌，執教曼聯以來主場踢過7場本土盃賽，全勝之餘更有6場係贏兩球或以上，而佢之前兩度執教車路士，18場本土盃賽主場賽事有14勝3和1負，可見「寸王」應付一場過淘汰賽極有心得。曼聯今季嘅反彈能力同樣唔錯，之前共輸過8場波，其中7次可以喺之後一仗贏波反彈，可見莫連奴嘅球隊甚少一蹶不振，今晚係時候化悲憤為力量。
白禮頓板櫈深度輸蝕
白禮頓近期氣勢幾好，之前曾創下7場不敗佳績，可惜上場輸畀愛華頓0比2打窒條氣。佢哋最大問題係板櫈深度不足，陣容變化較少，今仗缺少停賽嘅右翼安東尼洛卡特，另外右閘邦治及中場達爾史堤芬斯亦有傷，影響咪話唔大。白禮頓晉級過程未遇太大考驗，上兩圈只係淘汰低組別球隊高雲地利及米杜士堡，今仗難阻矢志重建聲威嘅曼聯。
分享到：