阿蘇停賽見好就收
西甲好戲停不了，周日晚就有巴塞隆拿主場迎擊畢爾包。「1哥」巴塞今季可以維持到高水準演出，主帥華爾維迪重視防守嘅踢法功不可沒，現時球隊有8分領先優勢，近期排陣更見以穩陣行先，呢場仲有射手蘇亞雷斯停賽，中位數3.5球入球細又點可以錯過？
（Now 632周日晚上11時15分直播）
歐洲各大聯賽都進入最後直路階段，西甲都唔例外，嚟到最後10輪，但巴塞依然係4大聯賽之中唯一一支不敗之師，縱使唔少人都會覺得有「球王」美斯坐鎮，巴塞可以喺西甲打橫行，「不敗」其實冇乜大不了，但係佢哋咁巴閉絕非美斯一人之功，尤其唔可以忽視教練華爾維迪！事關佢一手「湊大」嘅烏姆迪迪今季大熟大勇，24歲仔已經成為後場不可或缺嘅主力，加上原本嘅碧基、佐迪艾巴一班星級後衞，成功改善球隊防守層面上嘅問題，令後防不時「派膠」嘅巴塞，變得「有前有後」，難怪可以喺聯賽榜放甩成條街，仲係今季西甲失波第2少嘅球隊，勁到冇朋友。
華爾維迪識玩留放
事實上，華爾維迪喺輪換留放都有一手，自球隊踏入2月，由於積分上有優勢兼歐聯重開，除咗不時收起美斯，好多時贏到一、兩球就收手，所以近8仗聯賽有7次開3球或以下，而唯一一次大炒，就係基羅納「唔識死」先開紀錄，巴塞隨即「撻着」連入6粒，況且今仗巴塞射手蘇亞雷斯要停賽，估計入波唔慌多。
另一邊廂，畢爾包攻擊力勁差，近7仗聯賽有4次交白卷，根本冇力攻破巴塞嘅超強防線，但喺防守方面，佢哋近17仗聯賽未失多過2球，仲試過以0比0悶和皇馬，表現都算硬淨，今仗造訪魯營球場未至於會大敗，中位數3.5球嘅入球細堅好路！
分享到：