8強演「英超王者」對決
今晚英足盃8強上演「英超王者對決」，前季英超盟主李斯特城於主場迎戰上季聯賽冠軍車路士。剛喺歐聯16強畀巴塞隆拿淘汰嘅車路士，今季唯一奪冠希望剩低足總盃，今仗肯定搏盡搶攻求過關；近期回勇嘅「狐狸」亦唔會坐以待斃，佢哋近5次主場面對「車仔」都有來有往全開大盤，今場中位數2.5球大盤有1.85倍絕對值得追捧。
（ViuTV 99及Now 633周一凌晨零時30分直播）
防守轉差 干地以攻代守
無論計人腳或球隊資源，毫無疑問車路士肯定更勝一籌，事實上作為傳統Big 6勁旅，「車仔」近5次作客面對李斯特城，法定時間取得3勝1和1負，往績上都佔優，理應被睇高一線。不過車路士上周中啱啱喺歐聯16強作客吞巴塞3蛋被淘汰，除士氣大受打擊之外，體能上都較輸蝕，再者車路士近期作客表現勁差，近5仗客戰輸晒，夾埋仲失咗12粒，以往嘅穩健防守蕩然無存，領隊干地屬有料之人，深知球隊近期防守麻麻，今場隨時以攻代守，寧願搶攻爭取多啲入球。
李斯特城爭盃精銳盡出
李斯特城現時聯賽排名第8，既冇降班危機，又唔夠班爭歐戰席位，可以全心應付足總盃，今晚主場出擊亦會精銳盡出。李斯特城上仗聯賽落後下，連追4球反勝西布朗，睇得出一眾「士哥拿」腳氣大順，早前鬧離隊風波嘅馬列斯亦「生性」交出1助攻1入球，證明佢回心轉意為球隊賣命，配合好拍檔占美華迪，同喺足總盃經常有驚喜演出嘅伊恩拿祖，「狐狸」絕對有力對車仔後防構成威脅。既然兩隊為晉級準備放手一搏，今仗入波肯定唔會少，中位數2.5球嘅大盤不容錯過！
分享到：