祖雲達斯繼周中補賽後，今晚意甲又再登場，作客史帕爾。祖記後勁非常凌厲，打出聯賽12連勝，佢哋盡展意國「功利足球」精髓，只為贏波攞3分，唔會追求悅目大勝，近9場聯賽有8仗總入球係2球或以下，客W太熱冇肉食，博入球細更划算。
（無綫myTV SUPER 302台周日凌晨3時45分直播）
祖雲達斯今季大部分時間喺聯賽第2、3位徘徊，以為意甲會變天，點知拿玻里唔爭氣，近兩仗失5分，令祖記一下子爭標形勢大好，反超前領先佢哋4分，向意甲7連冠又邁進一步。
近15場聯賽僅失1球
祖記最犀利係防線極之穩定，近15場聯賽僅失1球，其中近9場聯賽更加冇失波，但除咗贏薩斯索羅7比0之外，其餘8場都係小勝1比0或2比0。總之祖記打開紀錄後，就慢慢磨死對手，呢招真係萬試萬靈。加上剛於周中踢完補賽對阿特蘭大，教練阿里基或會輪換部分主力，大炒對手嘅機會進一步降低。
史帕爾急需搶分護級，但要攻破「斑馬兵團」大門，機會微乎其微，只能靠死守，希望博攞1分。史帕爾上月作客拿玻里，只係小負0比1，表現都算幾硬淨，相信今場唔會大敗。
分享到：