巴西聖保羅省聯賽打到8強階段，周四早上將會上演兩場次回合比賽，其中巴甲勁旅彭美拉斯返主場再鬥非聯賽球隊路禾利桑天奴。彭美拉斯首回合作客都贏3比0，實力明顯高幾班；路禾利桑天奴為收復失地亦冇得再死守，既然兩軍過去3次碰頭總入球皆至少有3球，捧2.5球大盤最好路。
（周四早上8時45分開賽，馬會網上文字直播）
彭美拉斯首回合憑進攻鐵三角杜度、韋利安高美斯及基奴各建一功，作客以3比0輕取路禾利桑天奴，雖然手揸3球優勢，不過彭美拉斯係今屆巴省聯分組賽入波最多嘅球隊，12場比賽轟入19球，踢法擅攻不擅守，嚟到淘汰賽相信唔會貿貿然改變踢法。路禾利桑天奴已經冇嘢再輸，相信亦唔會刻意死守，睇番路禾利桑天奴今屆巴省聯6場作客只有1場冇入波，其餘5場加埋入9球，唔排除可以喺彭美拉斯身上取得入波。翻查兩軍過去3次於巴省聯碰頭全部至少有3球交收，今場捧2.5球嘅入球大最穩陣。
山度士入球細Encore
另一支巴甲傳統勁旅山度士就喺主場迎戰丙組仔保地花高SP。山度士首回合作客打和0比0，今場只要贏波便可篤定晉級，不過佢哋近期因要兼顧自由盃，對上3場巴省聯都贏唔到波，球員明顯開始有疲態。保地花高SP雖然級數低兩班，但對上8場巴省聯只係輸過1場，當中有5場保持清白之身，8場總入球都唔超過兩球，今場捧細盤啱數。
（周四早上6時30分開賽）
分享到：