阿德萊德聯今日澳職主場出擊，迎戰「2哥」紐卡素噴射機。「阿聯」要搶分保住前6位置，同力爭更高排名，面對已穩得季後賽資格嘅噴射機，戰意肯定更高昂，「阿聯」小讓平半，一於力撐1.93倍上盤！
（有線64、603台周五下午4時50分直播）
「阿聯」上仗主場對墨爾本城，佔盡優勢下畀對手逼和，依家仲要為前6打拚。球隊自中前場好波之人阿比沙路臣復出後，火力提升唔少，以現時陣容嚟睇更屬全季最強，加上中鋒卡禾斯域開始融入，進攻更多元化，絕對有本錢贏波。「阿聯」排名唔及噴射機，但都要讓平半，睇得出莊家對主隊具信心，空穴來風未必無因，上盤有計。
噴射機一口氣缺3大將
紐卡素噴射機雖排聯賽次席，但嚟到季尾問題浮現，先有中前場主力納博特突轉戰日職，令前線頓失重心，另一大將哥斯達柏拉杜斯畀澳洲國家隊徵召今場又缺陣，首席中鋒奧當路雲亦要停賽，冇晒呢3位大哥，球隊進攻死晒火！後防方面中堅保加特仍未傷愈，作客認真危危乎。
至於聽日兩場澳職，FC悉尼上場搏完亞冠盃後導致聯賽失分，令榜首形勢緊張起嚟，作客面對踢風流波嘅中岸水手，FC悉尼係時候重返勝軌；另一場墨爾本城前6席位未穩，主場鬥殘陣西悉尼流浪者，主隊嗰3分睇怕「冇走雞」。
分享到：