阿根廷將喺中立場英國曼徹斯特出戰意大利。阿根廷外圍賽幾經辛苦至驚險出線，見過鬼一定怕黑，備戰態度必然更認真。意大利冇得踢決賽周，陪太子讀書唔慌搏命，看守領隊迪比亞治奧只屬臨時工，球隊又處於重建期，招架唔住星光熠熠嘅阿根廷，捧1.82倍主勝！
（周六凌晨3時45分開賽，馬會網上文字直播）
阿根廷喺外圍賽要踢到最後1輪先取得決賽周入場券，領隊森柏奧利勉強保住帥位，但仍備受壓力。若然阿根廷今屆成績欠佳，森柏奧利好大機會烏紗不保。阿根廷今仗精銳盡出，美斯、阿古路、希古恩及迪馬利亞等統統入圍，畀森帥演練陣式，況且熱身賽踢得好亦有助提升信心同士氣，相信阿根廷唔會Hea踢。
近兩次對賽意大利輸晒
意大利喺外圍賽附加賽畀瑞典淘汰，前領隊雲杜拿下台，安察洛堤等名帥又拒絕接手呢個燙手山芋，皆因佢哋知意國足球千瘡百孔有排執，最終焗住搵U21國家隊主帥迪比亞治奧做看守領隊。佢今次沿用雲杜拿時期嘅班底，連之前話退出國家隊嘅保方都反口出山。意大利新瓶舊酒難有進步，近兩次同阿根廷踢熱身賽都輸波而回，實難睇好。
分享到：