粉絲眾多嘅英格蘭今晚將作客荷蘭，雖然「三獅兵團」陣中有唔少球星，不過王牌射手哈利卡尼缺陣下，冇人擔得起數胡重任，而且英格蘭創造力不足問題未解決，對住同樣守強攻弱嘅荷蘭隨時悶戰一場，1.66倍入球細屬正路之選。
（周六凌晨3時45分開賽）
哈利卡尼缺陣 修夫基頭痕
英格蘭踢熱身賽成績認真麻麻，對上5場熱身賽3和2負未贏過，上年底對住德國同巴西都悶和0比0，睇戰果唔算失禮，但亦反映到「三獅」創造力不足嘅問題，今次點兵「哈神」哈利卡尼受傷未有入選，無論主帥修夫基用占美華迪、韋碧克定拉舒福特，都畀唔到人信心，日前操練就有指班前鋒唔多識入波，令修帥勁頭痛。
緣盡世界盃嘅荷蘭上月請嚟名宿朗奴高文執教，今仗係佢上任後首騷，當然唔想失威。志切重建嘅荷蘭都有唔少新面孔，包括名將之後祖斯甸古華特有機會處子登場，不過荷蘭中後場似乎更可靠，隊長華基爾雲迪積克領導防線表現唔曳，荷蘭近3場比賽冇失過波，絕對唔赦「冇牙獅子」。
分享到：