列強拍跳烽煙四起
距離6月俄羅斯世盃決賽周揭幕唔夠3個月，各支列強積極備戰，今晚國際熱身賽就激戰連場，4支決賽周分子德國、西班牙、英格蘭及阿根廷、聯同冇份踢世盃嘅荷蘭及意大利，上演「豪門大廝殺」。當中「德西阿」更係今屆世盃前4大熱門，即管睇吓呢幾支勁旅係咪真係孭得起「熱門」兩個字！
上屆世盃王者德國今晚主場同前屆冠軍西班牙上演「冠軍級」對決。「狂牛兵團」近年對親德軍都難發揮控球在腳踢法，德國踢熱身賽向來唔多上心，近7仗熱身賽有6次開2球或以下，今仗隨時陷膠着局面，中位數2.5球細盤絕對捧得過。
（無綫翡翠台及myTV SUPER 94台周六凌晨3時45分直播）
西班牙領隊洛特佩吉用人向來大膽，今次就棄用艾華路莫拉達、柏度洛迪古斯同法比加斯3位車路士球員，但同隊嘅翼衞馬高斯阿朗素就初次入選，狀態大勇嘅華倫西亞中場柏利祖亦榜上有名。至於好耐冇踢國家隊嘅馬體會箭頭迪亞高哥斯達都獲重召，但恐怕同班現役國腳欠缺默契。西班牙近年對住德國都少交收，近3仗全開2球或以下，未必有力撕破「日耳曼」大門。
日耳曼箭頭未夠級數
德國自前鋒高路斯退役後，近年雖有辛度華拿、史甸度同迪姆華拿崛起，不過呢幾位都未算頂級前鋒，搞到近排熱身賽經常啞火，近7仗熱身賽6次開2球或以下，包括同英格蘭及意大利等強隊互交白券，今仗又嚟「強強對碰」，1.75倍細盤相信走唔甩。
分享到：