神鋒犯華做東豈可失威
國際賽檔期神鋒訪華大鬥法！第2屆「中國盃」今晚喺廣西南寧市開打，今屆可謂星味十足，除由納比領軍嘅東道主國足之外，仲重金邀請到威爾斯、烏拉圭及捷克3支勁旅參賽，4路大軍以淘汰賽形式，決出王者。威爾斯快翼加里夫巴利、烏拉圭兩大射手蘇亞雷斯同卡雲尼都有隨軍出戰，星味爆燈，戲碼足以同歐洲賽場分庭抗禮！
今晚中國盃揭幕戰，東道主國足迎戰「歐洲紅龍」威爾斯。威爾斯剛由曼聯名宿傑斯接手帥位，「係龍係蟲」仲有待觀察；牌面較弱嘅國足近年對住歐洲球隊都大打守勢波，搞到對手前鋒冇啖好食，近9次全開2球或以下，威爾斯未必可大勝而回，大細中位數調整至2/2.5球，照捧1.66倍細盤。
（周四晚7時35分開賽）
今個賽事國足可謂派出最強人腳應戰，包括主力後衞馮瀟霆，同聯賽開咧腳風勁順，以7個入球領先中超射手榜嘅前鋒武磊，配合一班常規軍如黃博文及郜林等，戰力唔算曳，不過張琳梵臨開波前因傷離隊外，老將鄭智亦傷愈冇耐未夠弗，冇入選今次大軍名單，缺少呢兩位中後場核心，主帥納比相信會「睇餸食飯」，先求守住後防，再睇下有冇機會打突擊。
傑斯初帶威爾斯未知「龍定蟲」
威爾斯陣容尚算完整，只得艾朗藍朗因傷落選，效力皇馬嘅前鋒加里夫巴利同熱刺後衞賓戴維斯都有隨隊，賓戴維斯賽前更表明刨熟晒武磊啲入波片，冇話因為級數高就輕敵。不過佢哋今場想大勝有難度，尤其面對擺明「泊大巴」嘅國足，「屈」慣速度嘅巴利未必會有空位發揮，加上今仗屬傑斯首次帶領威爾斯嘅正式比賽，執教經驗同臨場應變都輸晒畀納比，喺時候交吓學費，細盤捧得過。
分享到：