巴利仔決戰阿蘇卡雲尼
國際熱身賽「中國盃」今日喺廣西南寧市上演「雙料娛樂」，決賽由威爾斯鬥烏拉圭。威爾斯上仗狂炒國足6蛋，翼鋒加里夫巴利大演帽子戲法。烏拉圭兩位射手蘇亞雷斯、卡雲尼上仗各建一功，淘汰捷克，可見兩隊球星都交足功課，今仗「神鋒對決」應該會合演入球騷，捧入球大。
（周一晚7時35分開賽）
威爾斯由曼聯名宿傑斯執教下，大踢進攻足球，4強以6比0大勝國足，完全冇面畀。事實上，傑斯剛執掌帥印，急需要取得成績，鞏固地位，即使出戰熱身賽，亦會以認真態度對待，肯定特別想捧盃，省靚金漆招牌。加里夫巴利喺皇馬嘅前途亮起紅燈，同樣要證明自己，佢上仗轟入3球，顯示狀態一流，鬥心亦十足，有力再攻陷烏拉圭防線。
烏拉圭孖寶蘇亞雷斯、卡雲尼射術有幾犀利已經毋須多講，其中巴黎聖日耳門前鋒卡雲尼上仗更以一記倒掛金鈎，射入世界波，贏盡掌聲。賽事表演性質味濃，預料雙方都會主攻，有利製造入球。
季軍戰國足技遜捷克
季軍戰由中國對捷克，國足上仗慘吞6蛋出醜，今仗點都希望攞番個尾彩。問題係防線脆弱，若然勉強搶攻，隨時前面入埋唔夠後面輸，捷克有多位球員分別於德甲及意甲搵食，整體質素更勝國足，可以秤先。
（周一下午3時35分開賽）
分享到：