霸氣C朗一個玩晒
周二凌晨國際賽焦點戰，葡萄牙將會同荷蘭喺瑞士日內瓦中立場，上演06世界盃16強翻版大戰。葡萄牙頭號球星C朗拿度近期入波停唔到，有返晒以往以一己之力取勝嘅蓋世霸氣，呢仗面對上場對陣英格蘭時表現疲弱嘅荷蘭，葡萄牙贏面肯定高得多，主勝走唔甩。
（周二凌晨2時30分開賽）
2016年歐國盃盟主葡萄牙為備戰嚟緊嘅世盃，上仗就揾嚟埃及切磋，結果喺落後劣勢下，靠前鋒C朗以一人之力喺補時力挽狂瀾入2粒反勝。呢位皇家馬德里前鋒今季開咧其實唔算順利，不過踏入2018年就開始全面爆發，各項賽事近9次上陣狂入19球，每場平均入2.1球，效率驚人，睇嚟已經為出戰世界盃熱好晒身，而且佢過往4次代表葡萄牙出戰荷蘭，都入到4球，今次再遇私家菜，C朗點會同你客氣呢？
荷蘭鋒力弱 復興路坎坷
近年頻頻無緣大賽嘅荷蘭，世界排名已經跌出20名之外，縱使近期有國家隊名宿朗奴高文成為球隊揸弗人，不過佢啱啱上任仲需要時間同班波夾熟，而且荷蘭班底積弱已久，表現依然難有保證，上仗喺主場球迷吶喊助威下，依然不敵英格蘭，尤其由前鋒巴斯杜斯帶領嘅進攻組合質素明顯欠奉，搞到呢位前愛華頓主帥出師不利，睇嚟橙衣軍團嘅復興之路依然坎坷，呢場面對有C朗坐鎮嘅葡萄牙難有作為，捧主勝。
分享到：