澳職常規賽轉入最後直路，榜首FC悉尼昨日憑麥西蒙補時階段入波，作客2比1險勝中岸水手，現以8分領先次席嘅紐卡素噴射機，最快嚟緊禮拜四便可提前宣布衞冕成功。冠軍之爭基本上大局已定，不過季後賽資格仍然爭崩頭，2支仲有機會爭入前6名嘅球隊布里斯班獅吼及珀斯光輝今日分途出擊，呢個時候揀波戰意為上，獅吼上盤同光輝大盤都捧得過。
先講今日頭場布里斯班獅吼作客威靈頓鳳凰。獅吼作客3連勝，包括上仗以2比1爆冷擊敗FC悉尼，依家只係落後第6位嘅西悉尼流浪者2分，今場贏波便可爬頭升上第6位，以獅吼近期走勢呢3分志在必得。鳳凰23戰得17分排包尾，肯定無緣季後賽，近7場輸6場明顯散晒，獅吼小讓平半，上盤捧得過。
（無綫myTV SUPER303周日下午2時直播）
光輝勝利「大」激鬥
尾場珀斯光輝主場迎戰墨爾本勝利。光輝依家排第8，想踢季後賽數字上仲未絕望，佢哋對上3場主場聯賽全部贏晒，狀態、戰意都有保證，不過佢哋防線唔算穩陣，今季23場常規賽只有2場冇失波，係得包尾嘅鳳凰失波比佢哋多。勝利近期表現回勇，連同亞冠盃在內，近5場聯賽4勝1和，除咗射手貝利沙上場對中岸水手連中三元，利萊佐治亦連續3場聯賽有士哥，作客光輝預計唔會少入波，一於進取啲揀3/3.5球嘅入球大。
（無綫myTV SUPER303周日下午4時直播）
分享到：