仲有一場矚目熱身賽，英格蘭主場迎戰意大利，兩支傳統勁旅各有隱憂，「三獅兵團」英格蘭王牌射手哈利卡尼養傷，攻力大打折扣，意大利處於重建階段，仍然谷唔起，想入波都難。更何況球季進入爭標大直路，國腳們肯定以球會行先，踢「太公波」難免比較錫身，避免受傷，揀中位數2.5球細盤。
（Now 632周三凌晨3時直播）
大熟大勇嘅哈利卡尼缺陣之下，英格蘭鋒線只得占美華迪、拉舒福特及韋碧克可用，但3人級數都好難同「哈神」相提並論。其中占美華迪上仗對荷蘭，後備上陣22分鐘，竟然連1次掂波機會都冇，除咗個人狀態欠佳之外，亦反映球隊進攻組織力差。事實上，英格蘭由修夫基執教後，大踢悶蛋足球，近5場比賽有3場小勝1比0，兩場打和0比0。加上中場韋舒亞受傷退隊，更加唔好期望英格蘭會製造驚喜。
另一邊廂，意大利無緣今屆世界盃決賽周，而且只係由看守領隊迪比亞治奧暫時領軍，今場陪太子讀書，爭勝態度成疑。迪帥上仗首次帶隊亦以試陣為主，包括改踢433陣式，仲以首次入選嘅20歲翼鋒費達歷高基艾沙擔任正選，結果對住收起美斯同阿古路嘅阿根廷，都輸0比2，已連續3場冇波入，今場想喺溫布萊球場破蛋都好難。
分享到：