今夏世界盃2支奪標熱門西班牙同阿根廷，今晚會喺西班牙首都馬德里拍跳。「狂牛兵團」主場出擊一向霸氣十足，而且前線多位新人要搏盡爭取表現，戰意肯定高昂，今仗遇上傷兵滿營嘅阿根廷，大有機會先聲奪人，捧西班牙主W最好路。
（周三凌晨3時30分開賽）
西班牙陣中星光熠熠，不過中前場仍未有穩定嘅人腳組合，盧卡斯洛迪古斯、馬高阿辛斯奧、洛迪高摩連奴等入選球員，肯定要把握機會博表現，洛迪高摩連奴上仗對德國擔正就有波入，信心爆棚。事實上，西班牙有艾斯高、恩尼斯達等創造力強嘅中場支援，相信大把入波機會，何況西班牙主場向來進取，近7仗主場有6勝1和成績，其中5場保持清白之身，威力強勁。
美斯阿古路齊休戰
阿根廷依家傷兵眾多，王牌球星美斯因傷缺陣上仗對意大利嘅賽事，賽前消息話今仗亦可能缺陣，加上阿古路同迪馬利亞都受傷倦勤，前線3大巨星齊齊休戰，前線得希古恩搭住幾位新人，戰鬥力將會大打折扣，對住實力強橫嘅「狂牛兵團」到時被撞散。
分享到：