銘記世盃1:7血仇
今晚國際熱身賽爆發復仇之戰，巴西作客柏林火併德國。巴西喺上屆世盃大敗畀德國七個一皮，堪稱國恥，今仗誓要報番一箭之仇，但德國一班邊緣人如馬里奧高美斯等為博打世盃，亦會當決賽咁踢，鬥攻格局實多波入，一於捧中位數2.5球嘅入球大。
（無綫翡翠台及myTV SUPER 94周三凌晨2時45分直播）
堂堂足球王國，巴西在上屆世盃有主場之利下，竟喺4強以1比7慘敗畀最終成為盟主嘅德國，絕對係奇恥大辱，雖然今仗對德國只係熱身賽，但如此大仇足足等咗4年終於有得報，誓要贏波挽回面子，戰意唔使懷疑。就算王牌尼馬重傷要抖到世盃先復出，但以「耶穌」加比爾捷西斯、菲臘比古天奴、韋利安為首鋒線一樣咁煞食，後兩者日前大勝俄羅斯3比0之役都有士哥或助攻，仲有擅次後上入楔嘅中場悍將荷西保連奴，攻力強勁。
近3次交鋒炮製18個入波
另一邊廂，德國喺日前同西班牙「拍跳」雖然打和1比1，但雙方踢得幾開放，陣中除咗安利簡恩受傷退隊外，2大主力奧斯爾及湯馬士梅拿亦獲免役提早返球會報到。不過咁樣唔代表實力受削，因為「日耳曼兵團」人才濟濟，尤其係前鋒線，只有迪姆華拿幾乎肯定有份打世盃，其餘嘅馬里奧高美斯、辛度華拿及史甸度，為博打世盃都要爭崩頭，預計今仗會獲得上陣機會，梗係要趁機入多幾粒爭取表現，連同要爭正選嘅曼城孖寶根度簡及利萊辛尼，火力全開唔係人咁品，乘住巴西復仇心切掛住進攻，德國隨時有更多空位打反擊。加上雙方近3次交手，合共炮製18個士哥，全開3球或以上，相信今仗會合演入球騷，捧大盤最划算。
分享到：