沙拿弗爆希臘難擋
今晚至聽朝有多場國際熱身賽，阿King精選3場整條過關3串1，埃及喺中立場瑞士蘇黎世，出戰希臘。「埃及美斯」穆罕默德沙拿弗爆，上仗對葡萄牙，佢又射入靚波，睇怕希臘防線抵擋唔住呢位超級翼鋒，埃及主W可以作為重心。
（Now 670、Fox Sports Play及有線611台周三凌晨2時直播）
埃及相隔28年再進身世盃決賽周，梗係想做齣好戲，備戰態度一定特別認真，最重要係穆罕默德沙拿大熟大勇，今季為利物浦於各項賽事上陣40次射入36球，效率極高，上仗對葡萄牙，亦為埃及先開紀錄，可惜對手球星C朗仲犀利，補時入2球，搞到埃及功虧一簣。不過，今場對手希臘既冇C朗呢類頂級射手，亦冇份參加今屆世界盃，實力同戰意遠不及葡萄牙，埃及今仗應可由頭贏到尾。
串法國勝日本細
世界盃主辦國俄羅斯上仗吞巴西3蛋，賽後兩位球員紐斯泰達同拉殊仲擅自離開集訓陣營出去玩，可見球隊毫無紀律，加上近4場熱身賽只有2和2負，主場都抵擋唔住法國。（Now 633周二晚11時50分直播）另外，日本喺比利時中立場對烏克蘭，日本近4仗熱身賽未嘗1勝，狀態一般。烏克蘭首席射手耶莫蘭高受傷缺陣之下，上仗僅同另一亞洲球隊沙特阿拉伯打和1比1，今仗博入球細好過。
（周二晚8時20分開賽）
分享到：