一連4日嘅復活節假期開始喇！若果諗住Hea一Hea先至再全情投入去玩嘅，不妨今日下晝捧吓我哋球彩台嘅澳職直播先，而好戲碼就係由阿德萊德聯主場迎擊榜尾嘅威靈頓鳳凰，今場阿德萊德聯讓1/1.5球，小弟就揀上盤喇。
（有線64及603台周五下午4時50分直播）
阿德萊德聯早排仲喺排名榜第6位，經過呢幾個禮拜默默耕耘，依家有33分上咗第5位喇，緊隨其後嘅係西悉尼流浪者、珀斯光輝同埋布里斯班獅吼，依家常規賽只係得番3場，「阿聯」一定場場去盡，希望保住排前6殺入季後賽繼續有得玩啦。
巴巴迪亞華拉復出火力增
「阿聯」近兩場1勝1和，上場更係5比2大炒紐卡素噴射機，睇得出完全冇季尾階段狀態下滑嘅情況，反而愈戰愈有Heart添，球隊陣容亦冇任何傷停問題，今日有速度極快嘅前鋒巴巴迪亞華拉復出，真係如虎添翼，加上近5場主場聯賽保持不敗，有信心佢哋不勝無歸。
至於客隊威靈頓鳳凰係聯賽榜包尾大幡，肯定無緣進身季後賽，喺踢風流波嘅狀況之下，戰意成疑。再者今日球隊中場柏侯斯、後防丹尼爾慕倫、賴恩路尼都唔能夠上陣，陣容不整，加上盛傳又會再度更換領導層，真係問題天天多多，今日仲要作客喎，肯定凶多吉少啦。
復活節期間，我哋聽日同後日都各有一場直播陪大家。星期六有墨爾本勝利主場迎戰西悉尼流浪者，排緊聯賽榜第4位嘅墨爾本勝利需要爭取更佳排名，今次主場面對近排失波頻頻嘅「西流」，贏波冇問題。講到周日有紐卡素噴射機對「3哥」墨爾本城，噴射機就算上周畀「阿聯」大炒，都無損佢哋穩坐嘅2哥位置，相反墨爾本城要頂住，唔好畀墨爾本勝利過頭，鬥志信得過。
分享到：