周日凌晨英超大戰，愛華頓將會主場挑戰曼城。「藍月亮」曼城喺聯賽積分榜拋離追兵曼聯成16分，可以話已經手握半隻冠軍獎盃盃耳，因此戰意難免會鬆懈，加上球隊即將喺歐聯8強硬撼利物浦，今場未必會盡全力；相反愛華頓近年對親曼城都特別有火，睇好佢哋再有佳作，愛華頓下盤捧得過。（Now 621周日凌晨零時30分直播）
曼城領隊哥迪奧拿執教首季一個獎盃都攞唔到，多少令人失望，不過「藍月亮」上下都對哥帥有足夠信心，深信呢位曾帶領巴塞隆拿創造輝煌戰績嘅西班牙教頭，嚟到曼城依然可以締造歷史，結果已經捧起聯賽盃嘅「藍月亮」冇令球迷失望，而且佢哋一發不可收拾，聯賽贏足成條街成為奪標大熱之外，仲有機會染指歐聯寶座。不過再出色嘅球隊都有失手嘅時刻，今季「藍月亮」就曾多次因輕敵畀對手偷到雞，包括英足盃爆冷畀韋根淘汰，以及聯賽畀水晶宮等弱旅逼和，可見強如曼城都唔係百戰百勝。
拖肥近4對賽未輸過
尤其「藍月亮」今季對親嚟自默西塞德郡嘅對手都經常冇啖好食，除咗畀利物浦打破聯賽不敗金身之外，季初主場亦曾經畀愛華頓逼和。睇番近期對賽往績，「拖肥」近4次面對曼城取得1勝3和不敗戰績，可見愛華頓對付曼城係特別有計，今場面對有主力前鋒阿古路受傷上陣成疑，兼要留力歐聯嘅曼城，喺聯賽連贏兩場嘅愛華頓有能力再喺英超巨人身上攞到着數，「拖肥」受讓球半／兩球，一於捧下盤。
分享到：