利華搶前4同奧堡駁火

利華搶前4同奧堡駁火

利華古遜今季表現攻強於守，前線得分點多，不過防線演出就相當混亂，搞到成日輸埋啲冤枉波，近6輪聯賽輸咗3場，包括上輪作客0比2輸畀當時榜尾嘅科隆，搞到呢支表現最悅目球隊，依家已經淪落第5位，會方下令今仗不容有失，好在球隊經過國際賽休戰期回夠氣，呢班波雖然有前鋒艾拿利奧停賽，但首席射手禾蘭回歸掛帥，配合創造力極強嘅里安拜尼同祖利安白蘭特，前線火力回復強橫，利華一向最擅長打奧格斯堡，球會史上歷來同奧堡15度交鋒（包括德甲同德國盃），結果9勝6和未嘗一敗，今仗重返主場遇「私房菜」，當然上足彈藥喪攻求勝。

奧格斯堡近6輪聯賽只贏1場，上輪主場輸畀雲達不來梅表現奇差，主要原因係佢哋已經有35分，達到咗季初目標，降班威脅唔大，不過教練包姆鼓勵球員應該為前途而戰，今場作客對利華外界一致睇淡，正好喺冇壓力下踢場好波向球迷交代，何況如果今晚爆冷贏波，爭取下屆歐霸參賽權仲未絕望，所以冇理由保守。奧堡射手艾費特芬保加臣仍然養傷，不過另一射手基哥列舒治弗爆，除咗聯賽入球量高外，啱啱仲代表奧地利取得首個國際賽入球，今晚作客利華有信心延續佳態，既然兩軍都有爭勝同搶攻動力，今仗預期係入球騷，黑柴撐中位數2.5球大盤。
 

分享到：