無論波友嘅見解係主觀或客觀，相信陰謀論與否，大家都覺得，任憑教練點樣精心部署嘅排兵布陣，賽前如何針對性訓練，始終落場比賽係球員，教練幾叻都控制唔到。而且依家好多球員收入豐厚，唔似得以前啲人對教練咁尊師重道，死心塌地執行戰術，若果同教練唔咬弦的話，或受經理人影響為錢博走人，隨時突然跌Watt致輸波，甚至造反迫使主帥下台。前季先帶領李斯特城神奇勇奪英超冠軍、上季季中因面臨降班威脅而被炒嘅老帥雲尼亞里，就係畀球員逼走嘅最佳例子。
兩咸相遇睇好錘仔幫秤先
同樣係意大利籍主帥，干地上季憑住無敵343陣式，協助車仔重奪英超錦標，畀大家捧到上天，可惜今季多線作戰戰績下滑，歐聯出局及衞冕聯賽無望，依家喺聯賽只排第5位，落後「4哥」熱刺5分，若果聽晚兩軍正面交鋒時敗陣，連前4嘅歐聯入場券都隨時不保，令季尾好大機會掛冠而去嘅干地走得更肉酸；另一邊廂，熱刺主帥普捷天奴係當今炙手可熱嘅教頭，但能否獲得過檔皇馬、聖日耳門及拜仁等豪門嘅機會，就要睇佢過唔過到聽晚作客車仔呢關喇。至於今晚英超「兩咸相遇」，尾4嘅韋斯咸主場對尾3嘅修咸頓，現時「錘仔幫」領先對手2分，實力亦略勝一籌，只要今仗「6分波」取勝，便甩開修咸頓5分將佢哋打落谷底，大大紓緩護級壓力。（now 624周六晚10時直播）
分享到：