搶韁搶錢衝直接升超
來到季尾又係英冠球隊「搶錢」時候，前列球隊搏命搶分爭升班，只要取得英超席位，意味財源滾滾來。以目前形勢，前2位直接升班資格好可能落入狼隊同卡迪夫城之手，第2位嘅卡迪夫城的確銳不可當，取得8連勝，今晚作客錫菲聯，有力再下一城，博客W。
（周二凌晨2時45分開賽）
根據賽制，英冠頭兩位球隊可以直接升上英超，第3至第6位球隊需要踢附加賽，爭奪餘下1個升班席位。卡迪夫城領先第3位富咸7分，兼踢少1場，一定希望力保優勢，以前2位衝線。球隊狀態一流，近12場聯賽取得10勝2和，近8場更加贏晒，包括擊敗兩支爭升班分子米杜士堡、布里斯托城。中場卡林柏達臣連續4場有波入，腳風極順，今場作客都有破門把握。
錫菲聯遇強即屈
錫菲聯排第9位，只係落後第5位打比郡、第6位米杜士堡1分，仲有希望打入前6位。問題係球隊似乎後勁不繼，近5場聯賽只係贏過包尾嘅伯頓，對前列球隊富咸，就慘吞3蛋，可謂遇強即屈。加上錫菲聯近兩次主場鬥卡迪夫城都輸波，今場有地利亦冇運行。
分享到：