中央陸軍患「恐英症」
歐霸盃8強首回合今晚展開，英超阿仙奴主場迎擊俄超嘅莫斯科中央陸軍。「兵工廠」今季聯賽戰績低迷，爭入前4可以話極為渺茫，依家已將全副心機放喺歐霸度，希望捧盃獲得下屆歐聯入場券。法國射手拿卡錫迪傷愈領軍，火力更有保證，遇上患「恐英症」嘅莫斯科中央陸軍，主場可望強勢拔頭籌，讓1/1.5球照要1.77倍上盤！
（Now 633周五凌晨3時05分直播）
阿仙奴近期走勢唔曳，所有賽事錄4連勝，可惜聯賽落後太多，依家仲畀第4位嘅熱刺少13分，想踢下屆歐聯唯一途徑，就係拎歐霸冠軍。事實上領隊雲格講到明歐霸盃係未來最大目標，上一圈主客場「雙殺」意甲勁旅AC米蘭，演出明顯比踢聯賽時更突出及有鬥心。
槍手叉足電搏殺
雖然季中加盟嘅加蓬射手奧巴美揚唔合上陣資格，不過因傷缺席16強嘅法國前鋒拿卡錫迪，上仗聯賽對史篤城傷愈復出即有波入，由佢孭飛嘅鋒線同樣畀到人信心。加埋哥斯尼、米希達利恩同格列沙加上仗獲得休息，叉足電正選披甲，絕對有力喺首回合先拔頭籌。
莫斯科中央陸軍喺16強靠作客入球優惠淘汰里昂，實力有番咁上下，不過呢支俄超勁旅患「恐英症」，近5次歐洲賽作客英超球隊輸足4次，包括今屆歐聯分組賽作客1比2輸畀曼聯，今晚造訪酋長球場睇怕凶多吉少。
分享到：