壓迫踢法剋制曼城Tiki Taka
歐聯8強首回合開戰，今晚焦點非英超「紅藍內訌」莫屬，由「紅軍」利物浦主場迎戰「藍月亮」曼城。曼城主帥哥迪奧拿倡導嘅「Tiki Taka」傳控足球，今季英超所向披靡，不過面對擅於高壓打法嘅利物浦領隊高普，由德甲鬥到英超都唔見優勢，加上晏菲路球場一向係曼城「凶地」，今仗曼城仲要讓波，當然捧紅軍讓球主勝。
（有線602、603、604及662台周四凌晨2時45分直播）
哥迪奧拿秉承恩師告魯夫遺志，將「Tiki Taka」傳控足球發揚光大，曼城最快今個星期就可以喺英超封王，實力可以話係超晒班。不過呢種堅持由後場層層推進嘅打法，絕對唔係全無弱點，面對擅長中前場採取高強度壓迫嘅球隊，「Tiki Taka」踢法往往會被剋制住，而今仗對手利物浦嘅領隊高普，正係箇中高手。
近16次作客晏菲路不勝
事實上，藍月亮今季聯賽唯一敗仗，就係1月作客以3比4不敵紅軍，而且無論執教多蒙特或利物浦，高普過去同哥迪奧拿12度交手，錄得6勝1和5負嘅優勢，係少數面對哥迪奧拿可以佔到甜頭嘅領隊。況且，曼城自03年5月喺晏菲路球場贏過利物浦後，之後近16次造訪紅軍都未贏過，僅獲5和11負不堪成績，相當慘淡。
由「三叉戟」穆罕默德沙拿、羅拔圖法明奴同沙迪奧文尼領銜嘅紅軍鋒線，包辦今屆歐聯10仗攻入34球之中嘅21球，協助紅軍拎到6勝4和不敗佳績，曼城忌憚利物浦銳利嘅快速反擊，今仗未必敢輕舉妄動，紅軍有地利兼獲受讓，讓球主勝絕對值得支持。
分享到：