C朗追擊冇牙祖記
今晚歐聯8強次回合，皇家馬德里主場鬥祖雲達斯，皇馬繼上屆決賽炒祖記4比1後，又喺首回合大勝3比0，擺明食硬呢支意甲老牌球隊。歐聯史上從未有球隊可以主場輸0比3之下反勝晉級，祖記仲有首席射手保羅戴巴拿停賽，真係慳番啖氣爭聯賽錦標好過，隨時再輸鑊甘，皇馬讓一球，細鬼都要上盤。
（有線602及662台周四凌晨2時45分直播）
皇馬喺西甲爭標無望，果然特別落力踢歐聯，首回合作客照狂攻祖記，一舉打破對手連續27場歐洲賽主場不敗紀錄。巨星C朗演出光芒四射，個人梅開二度，包括一記極精彩嘅倒掛金鈎破網，連祖記鋼門保方都話輸得口服心服。
戴巴拿停賽 阿里基打定輸數
C朗之前6次對祖記都有波入，共轟入9球，簡直係祖記嘅噩夢。呢位葡萄牙國腳唔止好波，而且以鬥心強見稱，即使皇馬已遙遙領先，相信佢仍然會搏命爭取入波，展示「歐聯射手王」功架。睇番C朗上場西甲只係踢咗64分鐘就被換走，明顯留力今場搏殺，佢一人已經牽制住祖記全隊，就算中堅沙治奧拉莫斯停賽，預料皇馬防線都可以再次保住唔失波。
祖雲達斯首回合吞3蛋，教練阿里基話失埋第3球後，對球隊造成致命打擊，可見佢都冇乜信心次回合會反勝。事實上，祖記主場都捱打，如非皇馬球員浪費唔少入波機會，唔止輸3球咁少，足見兩隊實力有好大距離，今場作客更加危。
屋漏偏逢連夜雨，祖記射手保羅戴巴拿首回合被逐，今場停賽，呢位阿根廷國腳上場意甲入3球，今季聯賽有21球進帳，佢缺陣可以話嚴重削弱祖記攻力，就算中場比真歷坐完波監可以復出，恐怕都冇乜幫助，再輸兩球或以上好正路。
分享到：