英超冠軍幾近塵埃落定，前4的歐聯席位亦呼之欲出，來到季尾最有睇頭，梗係下游嘅護級爭逐喇。現時第15位嘅史雲斯、第16位嘅哈特斯菲爾德、第17位嘅水晶宮、第18位嘅修咸頓，於今晚聯賽全部都有地利。先講累積32分兼打少1場嘅史雲斯，形勢最有利，面對早已上岸嘅愛華頓，絕對係搶分良機；出戰33場同得32分嘅哈特斯菲爾德，迎戰無欲無求嘅中游分子屈福特，亦有機會贏波擸3分；至於落後1分嘅水晶宮，面對「13哥」、仍未上晒岸嘅白禮頓非常惡打，困獸鬥格局勝負難料；講到非勝不可，必定係「聖人」修咸頓，雖然比哈特斯菲爾德及水晶宮打少1場，但只係得28分，位列尾3嘅降班區，呢支近年頻頻賣走主力嘅中型班，終於嘗到苦果，近6場聯賽只得2和4負未贏過，個勢堅頹，如果今場再唔贏嘅話，恐怕積重難返，降班命運離佢哋唔遠喇。
分享到：