今晚英超尾場曼聯主場迎戰西布朗，紅魔近期聯賽走勢唔錯，取得5連勝之餘，其中4次仲開3球或以上，相反西布朗已經近9輪未贏過波，降班似乎已成定局，加上後場傷兵情況嚴重，呢場作客隨時中門大開，中位數2.5球大盤走唔甩。（Now 621周日晚上11時直播）
曼聯歐聯畀西維爾踢出局之後，球隊將所有精力都擺落聯賽同英足盃，表現即刻有起色，最把炮嘅肯定係上輪聯賽喺落後情況下，最終3比2上演絕地反擊，喺曼市打吡戰擊敗死敵曼城，報番季中輸波之仇，一吐烏氣，仲向班魔迷證明球隊實力同鬥志都絕對冇問題。其中最搶眼嘅，肯定係大踢爭氣波嘅保羅普巴，上仗打吡大戰，就係靠呢位法國中場嘅兩球入波，拉開紅魔反擊嘅序幕，呢場佢有望延續呢股氣勢，成為紅魔搶攻嘅利器。
西布朗搶分有前冇後
相反聯賽榜包尾嘅西布朗，近期戰績頹到爆，早前領隊柏杜仲因為咁畀叮走，近期球會仲炒埋技術總監，不過就算內部再亂再動蕩，西布朗始終想搶分下季留番喺英超，最緊要都係入到波，好彩兩大攻擊手查迪尼同史杜列治都傷愈復出，相信佢哋為護級肯定會搶攻，弊在後場多位主力，包括巴利同莊尼伊雲斯都有傷缺陣，變相畀咗對手紅魔一班進攻好手發揮嘅機會，加上西布朗近5仗作客4次開3球或以上，呢場睇嚟入波都唔會少，中位數2.5球入球大值博。
分享到：