英超榜首曼城經歷災難性3連敗後，今晚將作客溫布萊硬撼熱刺，雖然歐聯出局輸得難睇，但聯賽早已拉開手執半隻杯耳，雙料冠軍在望，相信曼城今晚能收拾傷痛踢番場好波；另一邊廂熱刺狀態托弗，哈利卡尼為爭神射手連阿女都搬埋出嚟，入球飢渴感爆燈，今場一於捧中位數2.5球嘅大盤。
（Now 621周日凌晨2時45分直播）
雖然曼城上場聯賽不敵曼聯2比3，未能提早封王，但依家領先次席13分，捧盃只係遲早嘅事，睇番曼城近幾仗連場失利，只能夠話賽程太密影響發揮，同埋真係欠缺少少運氣，因為進攻上曼城其實有大量機會可惜把握唔到，加上防守出錯導致3連敗，既然入得又失得，呢個時勢正好係捧大好時機。
曼城有望破英超入球紀錄
事實上曼城係英超入波最多球隊，目前已射入90球，相信今季破百機會極大，甚至有機會打破2009-2010球季車路士所創嘅103球紀錄，雖然阿古路今仗因傷缺陣，不過曼城冠軍已坐定笠六，領隊哥迪奧拿定必訂下目標等班球員唔好鬆散。
排第4嘅熱刺已拋離第5嘅車路士10分，歐聯入場券已相當穩陣，大可放鬆心情唔使泊大巴，其實熱刺餘下球季仲有另一任務，就係要協助當家球星哈利卡尼爭奪神射手，熱刺早前為上周對史篤城嘅入球上訴，要求原本判畀基斯甸艾歷臣嘅入球改判畀哈利卡尼，而哈利卡尼用到佢個女嘅性命嚟發誓自己掂過個波，事件已引嚟全球網民圍插，樂比無意落井下石，但既然卡尼想入波想到咁嘅地步，睇嚟今場真係有機會入多幾粒喎。
睇番上季勇奪神射手嘅卡尼，喺四月中後真係大爆發，最後7場入咗10球之多，而兩軍近年交手都係極旺開大，近14次碰頭就有12次開大，今場一於簡簡單單支持大盤。
分享到：