聯賽冇機‧留力歐聯
西甲今晚爆「馬德里打吡」，皇家馬德里主場對同市死敵馬德里體育會。兩軍聯賽爭標機會微，目標轉晒落歐戰度，特別皇馬衞冕西甲無望，全副精神放落歐聯，周中8強次回合再鬥祖雲達斯，今仗大有留力理由，未必讓得起死敵，捧2.12倍馬體會讓球客勝！
（Now 632周日晚10時15分直播）
皇馬上半季失分太多，即使近9場聯賽8勝，都未能追貼榜首巴塞，教練施丹自知無謂嘥力爭西甲，專心向歐聯埋手好過。皇馬上周中歐聯8強首回合作客贏祖雲達斯3比0，出線形勢大好，不過耗力亦大，嚟緊次回合再交鋒，為免畀「祖記」翻身機會，施丹今晚絕對有理由畀部分主力休息，寧留力歐聯，就算落場嘅球星亦未必去盡，以免受傷因小失大。
近9次交鋒銀河艦隊僅1勝
未計尋晚戰果，馬體會仲落後畀榜首巴塞9分，想後上極難，不過佢哋現時兼顧歐霸，仍有餘力應付今晚打吡戰。傳統上馬體會被視為「細佬」，比唔上皇馬，所以佢哋特別希望喺打吡戰攞威。施蒙尼執教馬體會後食住「銀河艦隊」，雙方近9次聯賽交鋒，馬體會竟獲4勝4和1負，不敗率近9成，「床單兵團」今場要全身而退唔難，受讓值博。
分享到：