「幫」死敵封王莫帥嬲爆
今晚英超快車獨腳戲，失落聯賽冠軍嘅曼聯作客對般尼茅夫。「紅魔」上仗主場輸畀包尾嘅西布朗，直接令死敵曼城提早封王，有傳主帥「寸王」莫連奴嬲到震，保羅普巴及阿歷斯山齊士等主力或被雪，但出「福仔」拉舒福特等「生牯仔」效果可能仲好，造訪主場一向以攻代守嘅「般茅」，隨時合演入球騷，中位數2.5球嘅1.65倍大盤捧得過。
（Now 621周四凌晨2時45分直播）
曼聯近期被嘲笑為「造王者」，前一輪反勝曼城3比2阻止對手封王，但上仗聯賽爆大冷於主場不敵包尾大幡西布朗0比1，正式將冠軍「頒」畀曼城，亦打爛埋主帥莫連奴逢執教球隊第2年必奪聯賽錦標嘅金漆招牌，激到「寸王」紮紮跳。莫帥更警告大牌球星唔係一定係正選，矛頭直指保羅普巴及阿歷斯山齊士，仲話明今場上陣嘅球員，唔代表嚟緊英足盃4強對熱刺要做番後備，明顯鼓勵有機會上陣嘅拉舒福特及連格等生牯仔要搏甩髀。
般尼茅夫主場入得失得
般尼茅夫現時有38分，距離傳統護級「安全線」只差2分，為盡早上岸主場必搏。況且「般茅」不嬲喺主場有前冇後，近10仗主場獲4勝4和2負，共入18球但就失番21球，全部開3球或以上，今仗再喺自己地頭出擊，唔赦同紅魔鬥攻，實多波入，一於捧中位數2.5球嘅入球大。
分享到：