今晚英超早場率先上演「默西賽德郡打吡」，愛華頓主場鬥利物浦，「紅軍」利物浦近期踢到曉飛，周中歐聯8強首回合大勝聯賽一哥曼城3比0，攻守兼備如有神助，更何況利物浦恰慣「拖肥糖」愛華頓，雙方近5次交鋒，利物浦取得4勝1和，今場客W應該冇走雞。（Now 621周六晚7時30分直播）
利物浦喺歐聯炒完曼城3蛋，晉級機會高唱入雲，可以放心踢好打吡戰。事實上，同市對決關乎面子，亦冇得留力，更何況「紅軍」狀態處於巔峰，近6場聯賽贏5場，其中4場贏2球或以上，真係勒都勒唔住，就算派副選迎戰，整體實力及默契亦明顯勝過愛華頓。同埋利物浦都希望盡快鎖定前4位置，確保可以參加下屆歐聯，絕對唔會放過「拖肥糖」。
愛華頓踢風流波戰意遜
排聯賽榜中游嘅愛華頓既冇降班壓力，亦難望取得歐戰席位，餘下聯賽猶如例行公事。愛華頓上仗主場對曼城僅錄得18％控球率，創英超史上單場最低控球百分比，可見毫無戰意。況且冰島攻擊手基菲爾施古臣早前受重傷長抖，令球隊實力大打折扣，今場即使坐擁地利，預計亦難逃一敗。
分享到：