常規賽煞科打吡戰鬥志行先
唔經唔覺，今輪係本屆澳職常規賽最後一輪比賽，打頭陣就有國家打吡，由FC悉尼主場迎戰墨爾本勝利。由於FC悉尼早早鎖定咗個常規賽冠軍，所以預計呢場佢哋喺正選名單以至陣容會有所保留，反觀作客嘅墨爾本勝利喺數字上仍然有機會反壓排第3嘅墨爾本城，爭取番個常規賽季軍。鬥志行先，今日一定信墨爾本勝利。
（有線603及604台周五下午5時50分直播）
FC悉尼以61分高踞榜首，大幅度拋離第2位嘅紐卡素噴射機14分，所以今場贏輸都冇所謂，因為都已經篤定係常規賽1哥，反而依家會着眼於下星期嘅亞冠盃，以佢哋而家嘅形勢，仍然可以一爭小組第2名出線淘汰賽階段。下星期就會同上海申花對壘，權衡輕重之下，相信教頭阿諾特一定會喺今場聯賽收起部份主力，留全力同申花一拚！以球隊近期主場戰績，佢哋都曾經輸過畀布里斯班獅吼、亦和過紐卡素噴射機同埋中岸水手，證明主場出擊唔係一定贏梗。
爭入三甲季後賽有着數
至於客隊墨爾本勝利雖然已經確定季後賽席位，但只係落後墨爾本城2分，只要今日作客搞掂1哥嘅同時，喺另一邊廂嘅墨爾本城又作客輸畀要喺主場謝幕嘅威靈頓鳳凰，佢哋就可以反壓墨爾本城、以常規賽第3名衝過終點。最重要係季後賽時，就可以主場出戰，兼且對手只係第6位嘅球隊。呢場勝利有後防拉斯威廉斯以及巴巴路西斯停賽復出加強攻守實力，加上近6場聯賽贏咗5場嘅氣勢，今日有力搶分，揀勝利「+1」嘅讓客最穩陣。
分享到：